သုံးလောကထွတ်ထားမြတ်စွာဘုရားရှင် သည် သုမေဓာရှင်ရသေ့ဘဝက လိုချင်လျှင် ပကတိသာဝက အဖြစ်နှင့် ကျွတ်တမ်းဝင်နိုင်ပါရဲ့ သားနှင့် သတ္တဝါတို့အပေါ်မဟာဂရုဏာတော် ကြီးထား၍ လေးသင်္ချေနဲ့ကမ္ဘာ တစ်သိန်း ပါရမီဖြည့်ရမည့် လမ်းကိုရွေးခဲ့ပါသည်။ ပါရမီဖြည့် စဉ်ဘဝတွေမှာလည်း အသွေးအသား၊ ကိုယ်ခန္ဓာအစိတ်အပိုင်းများသာမက ရင်မှဖြစ်သော သား၊သမီး တို့ကိုပင် ပေးလှူခဲ့တဲ့အထိ ပါရမီ တော်များကိုဖြည့်ခဲ့ပါတယ်။ ဒါကြောင့် ဤဗုဒ္ဓသာသနာတော်ကို "သွေးနဲ့ရေးတဲ့သာသနာ" ဆိုပြီး ဖြူး ဆရာတော် ကပူဇော်ခဲ့ပါတယ်။
ဤသာသနာကြီးနှင့်အတူ ဓမ္မရတနာတော်သည်လည်း အဖိုးအနဂ္ဂထိုက်တန်သလို၊ အမြဲတမ်းတိကျ မှန်ကန်ပြီး၊ အပိုအလိုမရှိပြည့်စုံနေပါသည်။ လောကမှာမြတ်စွာဘုရားထက်အမှန်ကိုသိတဲ့သူ၊ နိဗ္ဗာန်ကို ရောက်မဲ့လမ်း ကို ညွှန်ပြပေးနိုင်တဲ့သူရှိသေးလို့လား?။ ရှိတယ်လို့ပြောနေသူဟာ ညာတာပဲ။ တနည်းအားဖြင့် ဘုန်းတော်အနန္တ၊ ဉာဏ်တော်အနန္တ၊ ကံတော်အနန္တ နှင့်ပြည့်စုံသူမြတ်စွာဘုရားရှင် ကိုခြေရာတိုင်းနေကြတာပါဘဲ။ ဒေဝဒတ်ရဲ့လမ်းစဉ်လိုက်နေကြတာပေါ့။ သာသနာတော်အား အရိပ်နေနေ၊ အခက်ချိုးချိုး ဖျက်နေသူတွေရှိနေပါပြီ။
ထိုကဲ့သို့သောအဓမ္မဝါဒီ သမားများဟာ ကိုယ်တိုင်ကျူးလွန်လို့အားမရသေးဘဲ၊ အဇာတသတ်ကဲ့သို့သောနောက်လိုက်တပည့်များအား အဖော်ခေါ်နေကြတာက အလွန်ဆိုးပါသည်။ ထိုကဲ့သို့ဆရာအတင်မှားသောကြောင့် ယခုဘဝမှာတင်၊ မြတ်စွာဘုရားရှင်၏တရားကိုနာပြီးလျင် အရိယာ ဖြစ်သင့်ရဲ့သားနှင့် ပဉ္စာနန္တိယကံကြောင့် ငရဲသို့ရောက်ခဲ့ရတဲ့အထိ ဖြစ်ခဲ့ရပါသည်။ အခုခတ် အဓမ္မဝါဒီ သမားများ နှင့် နောက်လိုက်များ တွေးကြည့်ကြပါဦး။ သင်တို့ရဲ့ဆရာပြောတိုင်း မယုံကြပါနဲ့ဦး။ ကာလာမသုတ်တော်ကိုနာကြည့်ကြပါဦး။
အဇာတသတ် မင်းသားဟာရှေးပါရမီအတော်ရင့်ခဲ့ပြီးဖြစ်ပါသည်။ ဖြစ်ရခဲတဲ့လူဘဝ ရခဲ့တဲ့အပြင် ဖြစ်ရခဲတဲ့ ပြည့်ရှင်မင်းရဲ့သား၊ ဖြစ်ရခဲ့တဲ့ နန်းညွန့်နန်းလျှာဖြစ်ခဲ့ရသူပါ။ ဒါ့အပြင် ဖြစ်ရခဲတဲ့မြတ်စွာဘုရားရဲ့သာသနာ မှာလူလာဖြစ်ရတဲ့အပြင်သက်တော်ထင်ရှားမြတ်စွာဘုရားကို ဖူးတွေ့ခဲ့ရတာနည်းတဲ့ပါရမီလာဟင်?။ အခု ခတ် အဓမ္မဝါဒီ သမားများ ၏နောက်လိုက်များ တွေးကြည့်ကြပါဦး၊ သင်တို့ရဲ့ပါရမီ ကအဇာတသတ် လောက်ရှိ လို့လား။ ထိုသို့ပါရမီ ရှိပြီးသားလူတောင် ဆရာအတင်မှားလို့ သံသရာရှည်ခဲ့ရပြီနော်။
ဤပိုစ့် ကိုရေးရခြင်း၏အကြောင်းအရင်းကတော့
ကျွန်မဟာမြန်မာပြည်မှာနေတုံးက ဒီအဓမ္မဝါဒီတွေရဲ့အကြောင်း လုံးဝကိုမသိခဲ့ပါဘူး။ မိသားစု အသိုင်းအဝန်းထဲမှာလည်း ဒီလိုလူတွေကိုကိုးကွယ်တဲ့သူမရှိတော့ မသိပါဘူး။ ကျွန်မတို့တိုင်းတပါးကိုရောက်လာချိန်ကျမှ ဤတိုင်းပြည်က ယဉ်ကျေးမှုနှင့် ဘာသာရေးကို စတင်လေ့လာခဲ့ပါသည်။ ကျွန်မတို့မှာ လေးနှစ်အရွယ်သားလေးတစ်ဦးရှိပါတယ်၊ ကျွန်မတို့လင်မယား စတင်ပြီးစိတ်ပူလာတာက သားလေး ဘာသာမဲ့ဖြစ်သွားခဲ့ရင်၊ ဘာသာခြားဖြစ်သွားခဲ့ရင် ဆိုတဲ့အတွေးပါဘဲ။ ကျွန်မတို့လင်မယား စတင်ပြီးပြင်ဆင်နေပါပြီ။ သားလေးအား ဘုရားရှိခိုးသင်တာတမျိုး၊ ဓမ္မပဒ ကို အိပ်ရာဝင် ပုံပြင်များအဖြစ်တဖုံ၊ ကံ ကံ၏ အကျိုးကိုယုံကြည်လာအောင် သင်ပေးခြင်းတို့ဖြင့် အမျိုးမျိုး ကြိုးစားနေကြပါတယ်။
အဓမ္မဝါဒီ သမားများအကြောင်းကြားရတဲ့အခါကျွန်မတို့ရဲ့စိတ်ပူပန်မှု ကပိုလာပါတယ်။ အဓမ္မဝါဒီ သမား(မိုးပြာ၊ လူသေလူဖြစ် ဦးဥက္ကဋ္ဌရဲ့တပည့်များ၊ ဆူနာမီ၊ စသည်ဖြင့်) တို့ရဲ့ဝါဒတွေပိုပြီးပြန့်ပွါး လာခဲ့ရင်ဆိုတဲ့ စိုးရိမ်မှုပေါ့။ ထိုသူများ သည်ဘာလို့အဖော်ခေါ်ချင်ကြပါသလဲ?။ ထိုသူတို့ရဲ့ ဝါဒပြန့်ပွါးလာရင် မိရိုး ဖလာဗုဒ္ဓဘာသာဝင် လူငယ်လေးတွေအတွက် ရင်လေးမိပါတယ်။ ကျွန်မတို့သားလေးအပေါ် စိုးရိမ်မှုကနေ အနာဂတ် သာသနာအတွက် ပါပူပန်မိလာပါတယ်။ ဒါကြောင့် ဤပိုစ့် ကိုရေးရခြင်းဖြစ်ပါတယ်။
မြတ်စွာဘုရားရဲ့သာသနာတော်ကို သန့်ရှင်းအောင်၊ ပြန့်ပွါးအောင် စိတ်ရော၊ ကိုယ်ပါကျိုးပမ်း နေကြသော ဆရာတော်များ ကို ဤပိုစ့်နှင့်အတူ ကန်တော့လိုက်ပါတယ်။
Mrs Marga
No comments:
Post a Comment